Карціна Язэпа Драздовіча "Космас"
Гэта уласныя назіранні.
Зямля, Сатурн з кольцамі такія маленькія, цацачныя ў параўнанні з постаццю Творцы, такія слабыя і залежныя ад яго волі, што неадольна ўзнікае думка аб хрупкасці жыцця наогул.
Сустрэча з цудам
(усяго адна карціна Я.
Драздовіча)
Тое, што Я.
Драздовіч распачаў касмічную тэму ў беларускім выяўленчым мастацтве, ведаюць
усе. Але не аб гэтым размова. Я хачу распавесці пра тыя ўзрушэнне і здзіўленне,
якія адчула, упершыню ўбачыўшы (не, не карціну, а толькі яе рэпрадукцыю) “Космас” мастака -
найлепшы жывапісны твор з такой
неабдымнай назвай.
… Бяздонная,
бязмежная сінь космасу – і ў ім лунае між зорак і планет сівы мудры Творца
ўсяго існага, у абліччы якога пазнаецца сам мастак, яго блакітныя вочы і
апантаная вера, што розум чалавека загляне ў таямніцы Сусвету. Сапраўды, калі
Бог стварыў чалавека па свайму вобразу і падабенству, дык чаму не быць Богу
абліччам падобным на мастака!
Наіўна думаць,
што на карціне “Космас” Я.Драздовіч намаляваў
самога сябе ў космасе, што гэта ягоны аўтапартрэт на фоне касмічнай
бездані сярод зорак і планет.
Па-мойму, карціна
заключае ў сабе глыбокі філасофскі сэнс: космас бязмежны, магутны, загадкавы і
прыцягальны адначасова.
Творца Космасу –
Бог - трымае ў пальцах узнятай рукі
толькі што створаную ім новую планету Зямля, якая ў магутных пальцах Творцы
выглядае такой жа маленькай і бязважкава лёгкай, як тэнісны шарык. Яшчэ
імгненне – і гэты шарык, наша Зямля – будзе
адпушчаны, выкінуты ў свой вечны касмічны палёт.
Зямля, Сатурн з кольцамі такія маленькія, цацачныя ў параўнанні з постаццю Творцы, такія слабыя і залежныя ад яго волі, што неадольна ўзнікае думка аб хрупкасці жыцця наогул.
Карціна “Космас”
уражвае да глыбіні душы, прымушае ўспамінаць яе раз-пораз, выклікае захапленне
і здзіўленне перад геніем мастака: як Драздовіч дадумаўся ствараць ў гледача
роздум аб сэнсе жыцця і яго вытоках, аб космасе і месцы чалавечай цывілізацыі ў
ім?
Думаю, што і ў карціну “Космас”, і ў іншыя касмічныя
пейзажы Драздовіч пераносіць свае
чалавечыя мары пра хараство і гармонію, якіх так не хапае яму ў беспрытульным
вандроўным жыцці, напоўненым нястачамі і неўладкавальнасцю.
Комментарии
Отправить комментарий